ദക്ഷിണാഫ്രിക്കക്കെതിരായ രണ്ടാം ക്രിക്കറ്റ് ടെസ്റ്റിലും പരാജയം വഴങ്ങി പരമ്പര കൈവിട്ടതിന് പിന്നാലെ ലോക ടെസ്റ്റ് ചാമ്പ്യന്‍ഷിപ്പ് പട്ടികയിലും ഇന്ത്യ വൻ തിരിച്ചടി നേരിട്ടിരിക്കുകയാണ്. ലോക ടെസ്റ്റ് ചാമ്പ്യൻഷിപ്പ് പട്ടികയിൽ അഞ്ചാം സ്ഥാനത്തേക്ക് കൂപ്പുകുത്തിയിരിക്കുകയാണ് ടീം ഇന്ത്യ. നിലവിൽ പാകിസ്താനും താഴെയാണ് പട്ടികയിൽ ഇന്ത്യയുടെ സ്ഥാനം.
ലോക ടെസ്റ്റ് ചാമ്പ്യൻഷിപ്പിന്‍റെ ഭാഗമായി ഇതുവരെ 9 ടെസ്റ്റ് കളിച്ച ഇന്ത്യ ഇനി 9 ടെസ്റ്റുകളില്‍ കൂടിയാണ് കളിക്കുക. ഇതുവരെ ഒമ്പത് മത്സരം കളിച്ച ഇന്ത്യ നാലു ജയവും നാലു തോല്‍വിയും ഒരു സമനിലയും അടക്കം 52 പോയന്‍റും 48.15 പോയന്‍റ് ശതമാനവുമായി ലോക ടെസ്റ്റ് ചാമ്പ്യൻഷിപ്പ് പോയന്‍റ് പട്ടികയില്‍ അഞ്ചാം സ്ഥാനത്താണ്. ഫൈനല്‍ സ്വപ്നം കാണണമെങ്കില്‍ ഇന്ത്യക്ക് അടുത്ത ഒമ്പത് ടെസ്റ്റുകൾ നിർണായകമാകും.
ആകെയുള്ള 216 പോയിന്റുകളിൽ 130 പോയിന്റുകൾ എങ്കിലും നേടി പോയിന്റ് ശതമാനം 60 ലെങ്കിലും എത്തിക്കാൻ ഒമ്പത് ടെസ്റ്റുകളിൽ നിന്ന് 78 പോയിന്റുകൾ കൂടി ആവശ്യമാണ്. നിലവിലെ പോയിന്റ് സമ്പ്രദായം അനുസരിച്ച്ഒരു വിജയത്തിന് 12 പോയിന്റും സമനിലക്ക് 4 പോയിന്റുമാണുള്ളത്.
ആറ് ജയവും രണ്ട് സമനിലയും നേടിയെടുത്താൽ കണക്കുകൾ പ്രകാരം 80 പോയിന്റ് കൂടി ചേർക്കപ്പെടും. ഏഴ് ജയം നേടാനായാൽ 84 പോയിന്റും ചേർക്കപ്പെടും. കഴിഞ്ഞ സീസണുകളിലെല്ലാം പോയിന്റ് ശതമാനം 60 എങ്കിലും ഉള്ളവരാണ് ഫൈനലിലേക്ക് മുന്നേറിയിരുന്നത്.
ശ്രീലങ്കക്കെതിരെയാണ് ഇന്ത്യയുടെ അടുത്ത ടെസ്റ്റ് മത്സരങ്ങൾ നടക്കുക. ശ്രീലങ്കയിലാണ് മത്സരം. രണ്ട് മത്സരങ്ങളാണ് പരമ്പരയിലുള്ളത്. ശേഷം ഒക്ടോബർ-നവംബർ മാസങ്ങളിൽ ന്യൂസിലാൻഡിനെതിരെ രണ്ട് മത്സരങ്ങളടങ്ങിയ ടെസ്റ്റ് പരമ്പര നടക്കും. ന്യൂസിലാൻഡ് മണ്ണിലാണ് ആ പരമ്പരയും നടക്കുന്നത്.
2027 ജനുവരി-ഫെബ്രുവരിയില്‍ ഓസ്ട്രേലിയ ഇന്ത്യയിലേക്ക് അഞ്ച് ടെസ്റ്റ് മത്സരങ്ങളടങ്ങിയ പരമ്പരയില്‍ കളിക്കാനെത്തുന്നത് ആയിരിക്കും ഇനിയുള്ള ഹോം സീരീസ്. ഈ ലോക ടെസ്റ്റ് ചാമ്പ്യൻഷിപ്പ് സൈക്കിളിലെ ഇന്ത്യയുടെ അവസാന പരമ്പര ഇതാണ്.
Content Highlights: